![“Azərişıq” ASC Lənkəranda yenidənqurma işlərini davam etdirir.](/uploads/2024/03/29/news/1226/large/1226-0802483.png)
Cənab prezident İlham Əliyevin tapşırıqlarına əsasən regionlarda elektrik təsərrüfatını yeniləyən “Azərişıq” ASC Lənkəranın daha 5 kəndində – Viravul, Daştatük, Girdəni, Separadi və Gərmətükdə yenidənqurma işlərini davam etdirir.
Yenidənqurma işləri çərçivəsində adı çəkilən kəndlər arasında 4 min nəfərə yaxın sakini olan Viravul kəndində köhnə, sovet dövründən qalma dayaqlar yeni və müasirləri ilə əvəz edilir. İstismar müddəti başa çatmış açıq naqillərin yerinə Özünüdaşıyan İzolyasiyalı Naqillər (ÖİN) çəkilir. Ümumilikdə, kənddə 30 km-dən çox müasir elektrik xəttinin çəkilişi nəzərdə tutulur. Köhnə sayğaclar həyətyanı sahələrdən çıxarılaraq əvəzində müasir standartlara cavab verən yeni sayğaclar qoşulur.
Kənddə son 30 ildə əhali sayının artımı da nəzərə alınaraq yenidənqurma işləri çərçivəsində yeni transformator məntəqələri inşa olunur. Mövcud transformatorlarla yanaşı əlavə olaraq, 6 güc mənbəyi quraşdırılacaq. İşlər yekunlaşdıqdan sonra kənd sakinləri dayanıqlı və fasiləsiz elektrik enerjisi ilə təmin olunmaqla yanaşı, elektrik enerjisi itkisinin qarşısı da alınacaq.
Yaxın vaxtlarda isə şəhər mərkəzində yüksək gərginlikli xətlərin yenisi ilə əvəz olunmasına başlanacaq. Elektrik təsərrüfatının yenilənməsi nəticəsində ümumilikdə, 2 min 500-ə yaxın abonent dayanıqlı və fasiləsiz elektrik enerjisi ilə təmin olunacaq. Xatırladaq ki, 53 min 400 abonenti olan Lənkəranda 2015-ci ildən 30 kənddə kabelləşmə işlərinə start verilib. Bunlardan artıq 17-si tam, 8-i isə qismən kabelləşdirilib.
Yenidənqurma işləri Lənkəranla yanaşı, investisiya proqramına uyğun olaraq ölkənin bütün regionlarında, ən ucqar kənd və qəsəbələrdə də mərhələli şəkildə həyata keçirilir.
Digər xəbərlər
- “Azərişıq” ASC Qurban bayramında gücləndirilmiş iş rejimində fəaliyyətini davam etdirəcək. 15 İyun 2024
- “Azərişiq” ASC Kəlbəcər və Laçında yenidənqurma işlərini davam etdirir. 01 İyun 2024
- Müasir standartlara cavab verən sayğacların quraşdırılması 19 İyun 2024
- “Azərişıq” ASC Kəlbəcərdə yenidənqurma işlərini davam etdirir. 12 Aprel 2024
- “Azərişıq” ASC bayramla əlaqədar gücləndirilmiş iş rejimində fəaliyyət göstərəcək. 19 Mart 2024