"Azərişıq" ASC-nin təşkilatçılığı ilə Ümummilli Lider Heydər Əliyevin 102-ci ildönümünə həsr olunmuş elektroenergetika sahəsində "Gənc Mütəxəssislərin Peşə Ustalığı” yarışları 2-ci günündə Qarabağın daha bir gözəl guşəsi olan Hadrut qəsəbəsində davam edib.

“Hadrut” qovşaq yarımstansiyası və Rəqəmsal İdarəetmə Mərkəzinin Təlim-Məşq Poliqonunda əvvəlcə Cənab Prezident İlham Əliyevin tapşırıqları əsasında “Azərişıq” ASC-nin  işğaldan azad olunmuş ərazilərdə gördüyü işlər haqqında qısametrajlı filmi təqdim olunub.

Daha sonra yarışlara start verilib. 13 komanda - “Qız qalası”, “Şirvanşahlar”, “Odlar yurdu”, “Naxçıvan”, “Qarabağ”, “Aran”, “Şimal-qərb”, “Qərb”, “Mərkəzi-Aran”, “Şirvan”, “Xaçmaz”, “Sumqayıt”, “Cənub” 4 tapşırıq üzrə peşə bacarıqlarını əyani şəkildə sınayıblar.

Final mərhələsinə yüksələn  "Qarabağ", "Cənub", "Naxçıvan" və "Mərkəzi Aran" komandalarının hər biri verilən iki tapşırığı qısa vaxtda ən doğru şəkildə yerinə yetirməyə çalışıblar.

Günün yekunlarına əsasən  "Qarabağ" komandası birinci, "Mərkəzi Aran" ikinci, "Cənub" komandası üçüncü yerə layiq görülüb. Qalib komandalar diplom və kubokla mükafatlandırılıb.

Qeyd edək ki, "Azərişıq" ASC Qarabağ və Şərqi Zəngəzurla yanaşı ölkənin bütün regionlarında maarifləndirici tədbirlər, yarışlar həyata keçirir. Səhmdar Cəmiyyətin əməkdaşlarının peşə bilik və bacarıqlarının artırılması, təhlükəsizlik qaydalarına əməl olunması və insan həyatının mühafizəsi məqsədilə belə tədbirlər gələcəkdə də davam etdiriləcək.