“Azərişıq” Açıq Səhmdar Cəmiyyətinin missiyası istehlakçıları fasiləsiz, keyfiyyətli, təhlükəsiz və səmərəli  elektrik enerjisi ilə təmin etməkdir.

İstehlakçılarla təchizatçı şəbəkə arasında “Elektroenergetika haqqında”   qanunun və “Elektrik Enerjisindən İstifadə Qaydaları”nın tələblərinə əsasən qarşılıqlı münasibətləri tənzimləyən  alqı-satqı müqaviləsi bağlanılır. Tərəflər müqavilə üzrə öhdəliklərin yerinə yetirilməsinə görə məsuliyyət daşıyırlar. Təchizatçı şəbəkə üçün vəzifə öhdəliyindən biri də satılan elektrik enerjisinin dəyərinin yığılmasını təşkil etməkdir. Eyni zamanda istehlakçılar istifadə etdiyi elektrik enerjisinin dəyərini vaxtında və tam ödəməyə görə məsuldur.

Elektrik enerjisinin dəyərini vaxtında və tam ödəmə, cəmiyyətə və mühitə olan məsuliyyətin bir hissəsi kimi qəbul edilə bilər. Bu, enerjidən istifadəni daha məsuliyyətli və davamlı edir. Həmçinin, fasiləsiz elektrik enerjisi ilə təmin edilmənin və xidmət keyfiyyətinin yüksək səviyyədə saxlanılması, eyni zamanda elektrik şəbəkələrində müasir texnologiyaların tətbiqinə şərait yaratmaqla maddi-texniki bazanın müasirləşdirilməsini və uzunmüddətli iqtisadi səmərəliliyə töhfə verir.