SCADA sistemi komputer bazası əsasında qurulan və  proqramlaşdırılan avtomatlaşdırılmış məsafədən idarəetmə sistemidir. Sistem iqtisadiyyatın bir çox sahələrində istifadə olunduğu  kimi, enerji sistemində və elektrik şəbəkələrində də  tətbiq olunaraq  uğurlu nəticələr əldə edilir.

Sistemin  əsas funksiyası şəbəkəni  operativ  idarə edən dispetçerlə (personalla),   şəbəkə   arasında  birbaşa vizual  əlaqə yaradır. Bu sistem vasitəsilə şəbəkənin elektrik avadanlıqlarına  nəzarət və onları idarə  etmək, təcili əməliyyat çevrilmələri  həyata keçirmək, elektrik hadisələrini təhlil və analiz etmək, ölçülər aparmaq, hesabatlar hazırlamaq  mümkündür.  Bundan əlavə bu sistem, daha geniş funksiyalara - enerjinin alışını və axın istiqamətini müəyyən edir, enerjinin  keyfiyyətinə nəzarət  və monitorinqlər aparmaq kimi böyük  texniki  imkanlara malikdir.

“Azərişıq” ASC-nin elektrik şəbəkəsində  SCADA məsafədən idarəetmə sistemi 2010-cu ilin yanvar ayından qurulmuş və hal-hazırda  uğurla istismar olunur. Qısa müddət ərzində paylayıcı şəbəkənin onlarla güc və qovşaq yarımstansiyalarının SCADA  sisteminə  qoşulması əminliklə deməyə imkan verir ki,  bu  sistemin  şəbəkədə rolu əvəzsizdir.  Bu sistemə qoşulan yarımstansiyaların hər hansı birində enerji itkisi,  elektrik hadisəsi və ya bu kimi qəza baş verərsə, ani olaraq  həmin hadisə birbaşa xüsusi həyacan  siqnalı ilə  Mərkəzi Dispetçer Xidmətinə ötürülür ki, bu da  dispetçerin kompyuter displeyində əyani təsvir olunur. Hadisəni seyr edən növbətçi  dispetçer dərhal qəzanın baş verdiyi elektrik avadanlığını təyin edir, qəzanın yaranma səbəbini araşdırır  və qəzanın tez bir zamanda aradan qaldırılmasını həyata keçirir ki, bu da istehlakçıların enerji təchizatında  fasilə yaratmır.

Beləliklə, SCADA məsafədən idarəetmə sistemi nəticə etibarı ilə digər keyfiyyət göstəriciləri ilə yanaşı, şəbəkənin fəaliyyətində ümdə əhəmiyyət kəsb edən elektrik enerjisi itkilərinin azaldılmasına da  təsir göstərir.